«Сырдария – қауіпсіз аудан, болашақ ұрпақ мекені» жобасы аясында аудан көлемінде жол қауіпсіздігін қамтамасыз етуге бағытталған түсіндірме және профилактикалық жұмыстар жүргізілді. Іс-шараның негізгі мақсаты – тұрғындар арасында жол қозғалысы ережелерін сақтау мәдениетін қалыптастырып, құқықбұзушылықтың алдын алу.
Шара барысында жауапты сала мамандары мен полиция қызметкерлері жүргізушілерге және жаяу жүргіншілерге жол қауіпсіздігі талаптарын түсіндіріп, жылдамдықты шектен тыс асырмау, жол белгілеріне бағыну, қауіпсіздік белдігін тағу секілді маңызды талаптарды еске салды. Сонымен қатар, рейдтік іс-шара ұйымдастырылып, жол қозғалысы ережелерін бұзу деректері бақылауға алынды.
Мамандардың айтуынша, жол-көлік оқиғаларының басым бөлігі жүргізушілердің жауапсыздығы мен жол ережелерін сақтамауынан орын алады. Әсіресе, жылдамдықты шамадан тыс асыру, көлік жүргізу кезінде ұялы телефон пайдалану және жаяу жүргіншілерге жол бермеу қайғылы жағдайларға себеп болуда.
Түсіндіру жұмыстары кезінде тұрғындарға жолдағы тәртіп пен қауіпсіздіктің маңыздылығы кеңінен насихатталды. Сондай-ақ, ата-аналарға балалардың жолдағы қауіпсіздігіне ерекше көңіл бөлу қажеттігі айтылды.
Ұйымдастырушылар жол қауіпсіздігі – әрбір азаматтың ортақ жауапкершілігі екенін атап өтті. Өйткені жол ережесін сақтау – адам өмірі мен денсаулығын қорғаудың басты кепілі.
Айта кетейік, мұндай профилактикалық шаралар аудан көлемінде алдағы уақытта да тұрақты түрде жалғасады. Мамандар тұрғындарды жол қозғалысы ережелерін қатаң сақтап, өз қауіпсіздігіне бейжай қарамауға шақырды.
