«Руханият» орталығында Ұлттық кітап күні мен кітапханашылар мерекесіне орай «Кітап – ұлттың рухани тірегі» атты кең ауқымды мерекелік іс-шара жоғары деңгейде өтті. Тағылымы мол жиынға аудан әкімі Берік Сәрменбаев қатысып, руханият пен білімнің маңызын айқындайтын мазмұнды ойларымен бөлісті.
Салтанатты шараға аудан ардагерлері, зиялы қауым өкілдері, кітапхана қызметкерлері мен кітапсүйер оқырмандар жиналып, кітаптың қоғамдағы орны мен маңызын ұлықтаған мазмұнды бағдарламаның куәсі болды. Іс-шара аясында түрлі танымдық жобалар ұйымдастырылып, келушілер назарына кітап көрмелері, ұлттық әдебиет пен әлемдік классика жауһарларына арналған арнайы бұрыштар, сондай-ақ «кітап керуені» ұсынылды.
Жиында сөз алған аудан басшысы Берік Сәрменбаев көпшілікті Ұлттық кітап күнімен құттықтап, кітаптың адамзат өркениетіндегі баға жетпес құндылық екенін атап өтті. Ол бұл мерекенің рухани-танымдық мәніне тоқталып, кітап оқу мәдениетін қалыптастыру – ұлт болашағы үшін аса маңызды екенін жеткізді.
Сонымен қатар, Мемлекет басшысы Қасым-Жомарт Тоқаев бастамасымен аталып өтіп жатқан бұл күннің маңызына ерекше назар аударылды. Президенттің жастарды кітап оқуға баулу жөніндегі ұстанымы бүгінгі қоғам үшін өзекті екені айтылып, оқырман ұлт қалыптастырудың негізгі жолы – білім мен кітапқа деген сүйіспеншілікте екені кеңінен сөз болды.
Аудан көлемінде кітапхана ісінің дамуы да назардан тыс қалған жоқ. Қазіргі таңда өңірде 17 кітапхана жүйесі жұмыс істеп, білім беру мекемелеріндегі кітапханалармен қатар халыққа қызмет көрсетуде. Кітап қорын сақтау мен толықтыру бағытында 50-ден астам кітапханашы еңбек етуде. Соңғы жылдары кітапханалар заманауи талаптарға сай жаңғыртылып, «коворкинг» орталықтары, тегін интернет желісі және аудио-видео құрылғылармен жабдықталған. Бұл өз кезегінде оқырмандарға электрондық ресурстарды еркін пайдаланып, білім көкжиегін кеңейтуге мүмкіндік беріп отыр.
Салтанатты жиын соңында кітапханашылар мен белсенді оқырмандардың еңбегі жоғары бағаланып, аудан әкімінің Алғыс хаттары, Қазақстандық салалық кәсіподақтың Құрмет грамоталары және облыстық деңгейдегі марапаттар табысталды. Бұл – кітап оқу мәдениетін дамыту жолында аянбай еңбек етіп жүрген жандарға көрсетілген зор құрметтің белгісі.
Мерекелік күн аясында аудан әкімдігі тарапынан аудандық орталықтандырылған кітапханалар жүйесіне заманауи LED-экран мен дыбыс күшейткіш аппаратурасы сыйға беріліп, мәдениет саласының материалдық-техникалық базасын нығайтуға серпін берілді.
Іс-шара соңы аудан өнерпаздарының қатысуымен өткен мерекелік концертке ұласып, көрермендерге көтеріңкі көңіл күй сыйлады. Жалпы, «Кітап – ұлттың рухани тірегі» атты мерекелік кеш рухани құндылықтарды дәріптеудің жарқын үлгісіне айналып, кітаптың қоғам өміріндегі айрықша орнын тағы бір мәрте айқындап берді.
