Сырдария ауданында «Таза Қазақстан» экологиялық бастамасы аясында тарихи-мәдени мұра нысандары мен қорымдарды тазарту бағытында кең ауқымды жұмыстар жүргізілді. «Тағзым алаңы таза болсын, рух пен тазалық – бір ұғым» ұранымен өткен шараға аудан тұрғындары белсене қатысып, ортақ іске жұмылды.
Аудан әкімі Берік Сәрменбаев ардагерлер мен зиялы қауым өкілдері, сондай-ақ жергілікті халықпен бірге Қалжан Ахун мешіт-медресесі және Ешмұрат қорымы аумағында жүргізілген тазалық және абаттандыру жұмыстарына қатысты. Шара барысында нысандардың айналасы қоқыстан тазартылып, қоршаулар ретке келтіріліп, әктеу-сырлау жұмыстары атқарылды.
Жиында сөз сөйлеген аудан басшысы бұл бастаманың тек экологиялық емес, рухани маңызына да ерекше тоқталды. Оның айтуынша, тарихи орындарды күтіп ұстау – өткенге тағзым мен ұлттық құндылықтарды дәріптеудің нақты көрінісі. Сонымен қатар, мұндай игі істер жас ұрпаққа өнеге болып, туған жерге деген жауапкершілікті арттыра түседі.
Тазалық акциясы аудан көлеміндегі барлық елді мекендерді қамтыды. Нәтижесінде 50-ге жуық тарихи ескерткіш пен қорым аумағы тазартылып, абаттандырылды. Ауқымды шараға 3 мыңнан астам тұрғын қатысып, белсенділік танытты.
Қазақ халқының танымында киелі орындардың тазалығы ерекше мәнге ие. «Өлі разы болмай, тірі байымайды» деген қағида арқылы ұрпақтан-ұрпаққа жалғасқан бұл дәстүр бүгінгі күні де өзектілігін жоғалтқан жоқ. Осы тұрғыда ұйымдастырылған акция қоғамда тазалық мәдениетін қалыптастырумен қатар, тарихи мұраға деген құрметті арттыруға бағытталған маңызды қадам болды.
Ұйымдастырушылар алдағы уақытта да мұндай бастамалар жалғасып, өңірдің тарихи орындарын сақтау мен күтіп ұстау жұмыстары жүйелі түрде жүргізілетінін атап өтті.
