Сырдария ауданында цифрлық сауаттылықты арттыруға бағытталған жаңа бастама қолға алынды. «AMANAT» партиясы Қызылорда облыстық филиалының, Kyzylorda HUB және Қорқыт Ата атындағы Қызылорда университетінің бірлескен жобасы – «Amanat AI ToT» (Training of Trainers) өңірлік тренерлерді даярлау бағдарламасы аудан көлемінде ресми түрде бастау алды.
Алғашқы оқыту сабағы «Әбілпаттаев» бастауыш партия ұйымында өтті. Іс-шараға «AMANAT» партиясы Сырдария аудандық филиалының Атқарушы хатшысы Ақтөре Ибрагимұлы мен бастауыш партия ұйымының төрайымы Света Сақтапова қатысып, қатысушыларға цифрлық трансформацияның маңызы мен партияның осы бағыттағы жүйелі жұмыстары туралы кеңінен баяндады.
Ақтөре Ибрагимұлы өз сөзінде бүгінгі таңда цифрландыру үдерісі қоғамның барлық саласына дендеп еніп отырғанын атап өтті. Оның айтуынша, «AMANAT» партиясы бұл бағытты стратегиялық басымдықтардың бірі ретінде айқындап, нақты жобалар арқылы жүзеге асырып келеді. Соның бірі – өткен жылы «Daryn Ustaz» орталығымен бірлесіп іске қосылған «Ustazga AI» жобасы. Аталған бастама мыңдаған педагогтың жасанды интеллект құралдарын тиімді пайдалануына мүмкіндік берген. Сонымен қатар, «Жастар Рухы» жастар қанаты өңірде бірнеше жыл бойы 10-11 сынып оқушылары арасында спорттық бағдарламалау олимпиадаларын ұйымдастырып, жеңімпаздарға Қорқыт Ата атындағы Қызылорда университетінің білім гранттарын табыстап келеді.
– Бүгін басталған «Amanat AI ToT» бағдарламасы – осы жұмыстардың заңды жалғасы. Бұл жоба тек оқыту алаңы ғана емес, өңірлердегі цифрлық теңсіздікті азайтып, жастарға жаңа мүмкіндіктер ашатын маңызды бастама. Арнайы дайындықтан өткен аудан мамандары енді өз кезегінде жергілікті деңгейде білім таратып, оқыту жұмыстарын жүргізуде, – деді ол.
Бағдарлама аясында қатысушылар генеративті жасанды интеллект негіздерін меңгеріп, нейрожелілермен жұмыс істеу қағидаттарын тәжірибе жүзінде игереді. Оқыту барысында мәтін жазу, сурет жасау, презентациялар дайындау секілді дағдыларды жетілдірумен қатар, заманауи «vibecoding» тәсілдері арқылы бағдарламалау негіздері де қамтылған.
Жобаның басты ерекшеліктерінің бірі – Training of Trainers форматы. Яғни, қатысушылар тек білім алып қана қоймай, оны өзгелерге түсінікті әрі қолжетімді түрде жеткізу әдістерін де үйренеді. Бұл өз кезегінде өңірлерде білікті тренерлердің қалыптасуына және цифрлық білімнің кеңінен таралуына ықпал етпек.
Айта кетейік, оқыту жұмыстары алдағы күндері ауданның өзге де бастауыш партия ұйымдарында жалғасын табады. Атап айтқанда, «Тәжібаев», «Тоқтыбаев», «Құндызды» бастауыш партия ұйымдарында да осындай тренингтер өткізу жоспарланған. Бұл бастама Сырдария ауданында ғана емес, тұтастай өңірде цифрлық мәдениетті қалыптастыруға серпін береді деп күтілуде.
