23 сәуір – Ұлттық кітап күні мен Кітапханашылар мерекесіне орай аудандық “Руханият” орталығының алаңында «РУХАНИ ӘЛЕМ» атты кең ауқымды мәдени шара ұйымдастырылды. Ашық аспан астында өткен мазмұнды іс-шара кітап пен руханиятты ұлықтауға бағытталып, көпшілікке ерекше әсер сыйлады.
Шара барысында аудан әкімінің орынбасары Болатбек Ысмағұлов құттықтау сөз сөйлеп, кітаптың адамзат өркениетіндегі маңызына кеңінен тоқталды. Ол өз сөзінде кітап – рухани байлықтың алтын қазығы, ұлттың ой-санасын қалыптастыратын басты құндылық екенін атап өтті. Сонымен қатар, кітапхана қызметкерлерінің қоғамдағы ағартушылық рөлі ерекше екенін жеткізіп, олардың тынымсыз еңбегіне жоғары баға берді.
Мерекелік жиын аясында кітапхана саласының дамуына үлес қосып жүрген бірқатар қызметкерлер мен белсенді оқырмандар аудан әкімінің Алғыс хаттарымен марапатталды. Бұл – олардың мәдени-ағартушылық бағыттағы еңбегіне көрсетілген зор құрметтің айғағы болды.
Іс-шара барысында түрлі тақырыптық көрмелер ұйымдастырылып, келушілерге кітап оқу мәдениетін дәріптейтін мазмұнды бағдарламалар ұсынылды. Әдеби шығармалар, тарихи жәдігерлер мен заманауи басылымдар қойылған көрмелер көпшіліктің қызығушылығын арттырды. Ашық форматта өткен мәдени кездесу оқырмандар мен кітапсүйер қауымның басын қосып, рухани үндестік пен ой алмасу алаңына айналды.
Сондай-ақ, шараға арнайы қатысқан Amanat партиясы аудандық филиалының атқарушы хатшысы Жібек Баймұратова сөз сөйлеп, кітап пен руханиятты дәріптеуге бағытталған бастамалардың маңыздылығын ерекше атап өтті. Ол өз кезегінде партия атынан бірқатар азаматтарға алғыс хаттар табыстап, олардың қоғамдық белсенділігін жоғары бағалады.
Жалпы, «РУХАНИ ӘЛЕМ» атты мәдени шара көпшілікке көтеріңкі көңіл күй сыйлап қана қоймай, кітаптың қоғамдағы орны мен маңызын тағы бір мәрте айқындап берді. Рухани құндылықтарды дәріптеген бұл бастама аудан тұрғындарының мәдени өміріне серпін беріп, кітапқа деген қызығушылықты арттыруға ықпал етті.
