Ауданда көктемгі дала жұмыстарына дайындық барысы жан-жақты пысықталып, егіс науқанын сапалы ұйымдастыру мәселелері кеңінен талқыланды. Осыған байланысты бүгін аудан әкімі Берік Сәрменбаев төрағалық еткен мәжілісте ауыл шаруашылығы саласындағы өзекті міндеттер қаралып, жауапты тұлғаларға нақты тапсырмалар жүктелді.
Жиын барысында аудан басшысы Мемлекет басшысы Қасым-Жомарт Тоқаев айқындаған стратегиялық міндеттерге сәйкес, су ресурстарын тиімді пайдалану мен егіс алқаптарын әртараптандырудың маңыздылығына ерекше тоқталды. Әсіресе, климаттық өзгерістер мен су тапшылығы жағдайында ауыл шаруашылығын жаңа талаптарға бейімдеу уақыт талабы екені айтылды.
Аудан әкімінің айтуынша, қазіргі таңда су үнемдеу саясаты кезең-кезеңімен жүзеге асырылып келеді. Соған сәйкес суды көп қажет ететін дақылдардың көлемін оңтайландыру, су шығынын азайту және заманауи технологияларды енгізу бағытындағы жұмыстар жүйелі түрде жүргізілуде. Бұл өз кезегінде өңірдегі аграрлық саланың тұрақты дамуына мүмкіндік береді.
– Мемлекет тарапынан көрсетіліп отырған қолдау шараларын тиімді пайдаланып, көктемгі дала жұмыстарына тыңғылықты дайындалуымыз қажет. Су ресурстарын үнемдеу – бүгінгі күннің басты талабы. Сондықтан суды аз қажет ететін дақылдардың көлемін ұлғайтып, цифрлық технологияларды кеңінен енгізу арқылы ауыл шаруашылығы өндірісінің тиімділігін арттыруымыз керек, – деді Берік Әбдіғаппарұлы.
Биыл ауданда жалпы көлемі 32 064 гектар жерге ауыл шаруашылығы дақылдарын орналастыру жоспарланып отыр. Оның ішінде негізгі басымдық күріш шаруашылығына берілген. Атап айтқанда, 17 мың гектар алқапқа күріш егу көзделген. Сонымен қатар су үнемдеу мақсатында 2 мың гектарға жүгері, 1885 гектарға бидай, 384 гектарға мақсары, 105 гектарға соя және 10 мың гектарға жоңышқа орналастыру жоспарланған.
Мамандардың мәліметінше, қазіргі таңда жоспарланған егіс көлемінің 48 пайызына ауыл шаруашылығы дақылдары егілген. Бұл көктемгі дала жұмыстарының белгіленген жоспарға сәйкес жүргізіліп жатқанын көрсетеді.
Мәжіліс барысында сала мамандары техника дайындығы, жанар-жағармай қоры, тұқым сапасы, минералды тыңайтқыштармен қамту және суару жүйелерінің жай-күйі жөнінде баяндады. Сондай-ақ, көктемгі науқан кезінде туындауы мүмкін мәселелер сараланып, оларды дер кезінде шешу жолдары қарастырылды.
Жиын қорытындысында аудан әкімі жауапты сала басшыларына, кент және ауылдық округ әкімдеріне көктемгі дала жұмыстарын сапалы әрі мерзімінде аяқтау жөнінде нақты міндеттер жүктеді. Сонымен бірге, су үнемдеу технологияларын енгізу мен ауыл шаруашылығын цифрландыру бағытындағы жұмыстарды күшейту қажеттігін атап өтті.
