Ауылдық инфрақұрылымды жаңғырту бағытындағы жүйелі жұмыстар Қалжан ахун ауылында қарқын алып келеді. Елді мекендегі электр желілерінің тозу деңгейін төмендету мақсатында «Ауыл – ел бесігі» бағдарламасы аясында ауқымды жоба іске асырылуда.
Жобаны жүзеге асырушы мердігер – «Қызылорда электр тарату тораптары компаниясы» акционерлік қоғамы. Бүгінде аталған мекеме тарапынан электрмен жабдықтау жүйесін жаңарту бойынша бірқатар маңызды жұмыстар орындалған. Атап айтқанда, қуаты 10 кВ болатын бір дана КРН-IV-10 ұяшығы және 4 дана 10/0,4 кВ КТПБ қосалқы станциялары орнатылды. Бұл нысандар электр энергиясын тұрақты әрі сапалы жеткізуді қамтамасыз етуде негізгі рөл атқарады.
Сонымен қатар жоба аясында ауылдағы 242 тұтынушының электр есептегіш құралдары толықтай жаңартылып, вводтық кабельдері ауыстырылуда. Бұл шаралар электр энергиясын есепке алу дәлдігін арттырып қана қоймай, желідегі техникалық шығындарды азайтуға мүмкіндік береді.
Көшелерді жарықтандыру мәселесі де назардан тыс қалған жоқ. Жалпы ұзындығы 4,7 шақырымды құрайтын көше жарығы жүйесі жаңғыртылып, ауыл тұрғындары үшін қолайлы әрі қауіпсіз орта қалыптастыруға ықпал етуде.
Электр желілерінің негізгі бөлігі саналатын 10 кВ әуе желісі бойынша да ауқымды жұмыстар атқарылған. Нақтырақ айтқанда, 189 дана жаңа бағана орнатылып, ескі әрі тозған тіректер кезең-кезеңімен ауыстырылуда. Бұл өз кезегінде желінің тұрақтылығын арттырып, апаттық жағдайлардың алдын алуға септігін тигізеді.
Мамандардың айтуынша, жүзеге асырылып жатқан жаңғырту жұмыстары ауылдағы электрмен жабдықтау жүйесінің сенімділігі мен қауіпсіздігін едәуір жақсартады. Жаңартылған инфрақұрылым ұзақ мерзім бойы үздіксіз қызмет көрсетіп, тұрғындардың тұрмыс сапасын арттыруға негіз болады.
Жалпы, Қалжан ахун ауылында қолға алынған бұл жоба – ауылдық аумақтарды дамытуға бағытталған мемлекеттік бағдарламалардың нақты нәтижесінің бір көрінісі. Алдағы уақытта да осындай кешенді жұмыстар жалғасын тауып, өңір тұрғындарына қолайлы өмір сүру ортасын қалыптастыруға серпін бермек.
